政情：立會新樓隨時冇飯開
俗語有話三軍未動，糧草先行，但立法會新大樓十月啟用，飯堂招標工作至今仍未有進展。本來有一連鎖快餐店願意投標，但係獅子開大口，要求立法會免費附送裝修好嘅廚房，先至肯入標。班議員話如果有此優惠，對之前幾間餐廳好唔公平，所以打算好似西九咁「推倒重來」重新招標，十月新大樓開張恐怕議員們會「無飯開」。
行政管理會早前接觸過五間知名連鎖快餐店，有四間已經耍手擰頭拒絕投標，只得一間勉為其難，但佢哋要求立法會「貼埋大床」，要立法會斥資裝修好廚房，佢哋先肯制。除此之外，水、電、煤氣費用統統都要免。
有知情議員話，如果只向呢間連鎖快餐店「大特賣」，似乎對之前好幾間有意投標嘅餐廳唔係幾公平，所以好可能會重新招標。但又有議員話，如果無人肯做，死都唔會監平監賤租出去，寧願「吉」咗個位好過。但依家距離新大樓開幕不足三個月，只係計裝修都要用廿日，到時議員好大機會要買飯盒，去宴會廳享用。