政情：肥亨做非執董當進修
「活到老，學到老」雖然係老生常談，但係要坐言起行一啲都唔容易。尋日中策集團主席馬時亨現身中文大學校園，為一班五十歲以上嘅長者畢業生擔任主禮嘉賓。馬時亨話，佢辭官後都奉行「學海無涯」嘅古訓，依家仲學緊好多嘢。原來佢講緊做多間上市公司嘅董事，董事會就係佢嘅課室，之不過佢唔使交學費，仲有袍金攞添！
由基督教香港信義會與中大專業進修學院合作嘅「長者進修在信義」，尋日為一百三十幾位五十歲以上嘅畢業生舉行畢業禮，今年已經係第六屆。到賀者唔少係畢業生嘅孫仔孫女，場面零舍溫馨。
辭官啱啱滿三年嘅馬時亨話，其實佢冇退休，不過唔使朝朝靠鬧鐘叫醒佢。眼見咁多長者求學態度猶勝年輕人，佢都唔執輸，話自己做非執董嘅行業範疇好廣泛，有石油、港口同埋內地銀行，最近又獲國資委旗下嘅中糧集團委任做外部董事，佢都當上堂咁學嘢，總之唔偷得懶。