政情：湯修齊落場打機籌款
籌款活動要搞得夠潮又好玩，一啲都唔容易。博愛醫院主席湯修齊（Henry）畀足心機度橋嘅打機比賽，終於落實喺下個月廿一日舉行。
屆時Henry同埋囝囝Harris父子兵齊出動，博愛副主席、前亞姐冠軍陳李妮（Lily）亦將出戰。為咗呢場盛事，兩人梗要密密練兵喇！
尋日博愛一眾高層齊齊現身尖東日航酒店，為佢哋嚟緊嘅籌款活動瞓身宣傳。首次舉行嘅「博愛Wii ARE THE KING慈善爭霸戰」，獲得任天堂合作舉行，未登場先哄動，現在已經開始接受報名，吸引好多遊戲機迷注意。
Henry話，到時仲會舉行一場名人賽，誠邀城中名人出賽，共襄善舉。有興趣參加嘅公司，捐助三萬元就可以出賽。
平時公務繁忙嘅Henry，為咗今次比賽，經常孖住讀緊小學嘅囝囝到屋企會所打機備賽。兩仔爺大條道理去打機，太太Yvonne梗係冇得反對喇！