政情：唐唐又用公帑Sell「政綱」?

立法會尋日有條質詢關於唐唐偷步競選事件，由政制及內地事務局局長林瑞麟出嚟擋駕代答，佢話由始至終唐唐只得一個網頁，官方以外嘅嘢不予置評，答到平淡如水。

好嘞，到第二條關於政府民望時，唐唐終於現身，但議員明明係質問佢政府民望愈來愈插水，有無檢討過幾年來嘅施政過失，以及會唔會向公眾道歉。點知條條Fing嘅唐唐完全無正面回答，只係承認有部分政策原本有良好意願，但考慮未周，影響民望，但佢話題一轉，竟然夠膽死話過去幾年同七百萬市民同舟共濟，喺驚濤駭浪中保持香港金融體系同經濟社會穩定。其實特區政府有呢班官員掌舵，市民至真正喺驚濤駭浪中生活。

擁唐派做大龍鳳

唐唐一答完，「擁唐大龍鳳」先正式開始，率先上場嘅經濟動力劉皇發，問唐唐餘下任期會唔會聽取民意、之後工總出身嘅梁君彥，更問唐唐點樣改善行政立法關係，兩條問題擺明畀位唐唐上，等佢利用公眾場合發表疑似政綱。之後仲有唐唐「家臣」林大輝壓軸登場，問唐唐到底近期有無落區。聽到大輝條問題，唐唐更加好似發咗達咁，自爆過去兩個禮拜都有去探劏房居民，只係無喺鎂光燈面前進行，暗寸勁敵行政會議召集人梁振英次次落區探籠屋居民，都喺鏡頭面前表演。

唐唐離開立法會時，被問幾時至肯辭職，仍然只識傻笑。幾位擁唐派前後交咗幾次靚波畀唐唐，但佢始終無入波能力。公帑用咗，不過嘥晒。

至於唐唐幾時辭職，向來撐唐嘅詹培忠又爆料，話唐唐半年前成立咗「九一同學會」，邀請九一年做立法局嘅議員不時聚聚，估計九月廿五日係唐唐辭職之日，因為可以避免被十月嘅施政報告「炸傷」，而十二月廿五日就會宣布參選，因為當時選委會選舉已完成，有足夠時間拉票。