中環耳目：張永霖太太愛清淡「囍宴」
前亞視執行主席張永霖（Linus）淡出商界後，佢同太太Silvia都轉趨低調。閒來環遊世界，投古董名錶為樂。早前，Silvia難得返港，相約老友喺灣仔灣仔道「囍宴」食飯。貪佢少鹽少油少味精，食得安心。
「囍宴」係人氣名廚余健志（Jacky）「地盤」。Silvia話，五年前首次幫襯，訂枱半年先有位，菜式以時令食材為主，標榜新鮮健康，佢一年例必幫襯幾次。
Silvia柯打鎮店之寶金牌口水雞，但佢唔食得辣，只係淺嚼輕嘗。至愛之選，係香茅柑桔菊花魚，以桂魚切絲炸成金黃色，配柑桔及熱情果醬汁，酸甜好醒胃。
爆老公開咪談風月
食完飯，話題離不開老公。Silvia預告身為港大專業進修學院主席嘅Linus，九月將重返幕前開咪做節目，講明只談風月，不談政事。Linus暑期要返加國，已錄定兩集，Silvia寸步不離陪伴錄音。佢笑言係「副監製」，一唔對路就嗌Cut。
講番名廚Jacky，佢正籌備喺七月書展出版第五本食譜，賣點係教人炮製自家梅酒及秘製果醬，為生活注入驚喜。