中環出更：梁君彥家有賢妻羨煞旁人
工業界立法會議員梁君彥（Andrew），喺政界公職多多，見過唔少大場面。不過，講到倒瀉一杯茶咁小事，Andrew就變回小男人，乖乖等太太幫佢抹乾淨。
卓妮周二晏晝喺中環「Cafe Landmark」High tea，撞正Andrew同太太飲茶，同行仲有兩位女士。四人柯打三文治、麵包、咖啡等食物，分量輕盈，邊食邊閒話家常，氣氛寫意。
傾到興起之際，Andrew一個不留神倒瀉面前杯茶，倒濕白恤衫，除肚皮位置外，衫袖亦沾上污迹，顯得甚狼狽，佢馬上拎張紙巾，蘸些清水，用力地擦擦擦。
幫論盡老公抹茶迹
老公「有難」，梁太點會袖手旁觀，即時攞起紙巾，示意老公將右手放喺餐枱上，溫柔地幫佢抹走污迹，三兩下手勢就搞掂，家庭主婦果然有兩度散手。件衫乾淨晒，Andrew即時笑番，並掏出腰包埋單請飲茶。
離開餐廳後，梁太電話響起，Andrew故意拖慢步伐，寸步不離扶實太太。上扶手電梯之際，梁太單手揸電話，另一隻手既要拎Chanel手袋，又要按住扶手，鬼咁「牙煙」，Andrew醒目地緊握太太臂彎。行商場期間，佢又不時攬住太太香肩，呵護備至。老夫老妻仲咁恩愛，認真少有。
講番梁太，佢作風低調，甚少亮相社交圈，查實佢來自紡織世家、係已故前立法局議員張鑑泉妹妹，與從事製衣生意嘅Andrew，可謂非常登對。
卓妮