中環出更：紀文鳳修橋鋪路 五勞七傷
做善事講心，出錢或出力都無任歡迎。好似商界女強人紀文鳳，擔任無止橋慈善基金成員以來，經常出動腳力到內地協助偏遠貧困農村修建橋樑，久而久之搞到「五勞七傷」。話說佢三年前去甘肅，唔小心喺斜路跣咗三步，跌親條腰，結果要喺崎嶇嘅山路坐咗七小時車，再加兩小時飛機先至返到香港，仲因為夜得滯要忍痛到翌日朝先有醫生睇。
紀文鳳又憶述，去年到四川又拗柴，隻腳腫到成個血包咁，結果要睇足三日當地山區醫生兼飲草藥，難為佢仲笑得出話，擔心飲落去嗰陣會七孔流血致死，但佢話做善事無得怨，所以都會繼續去起橋喎。其實早幾日「無止橋」開記招介紹十一月舉行嘅「無止行2011」義行籌款，擔任籌委會主席嘅紀文鳳就聯同十一間大專院校嘅學生事務長及代表出席。
獲蔡關穎琴支持
今次籌款係幫慈善基金嘅營運同發展籌集經費，好多善長踴躍支持，台下仲有一位熟悉臉孔，就係中華總商會會長蔡冠深太太蔡關穎琴。原來蔡太嘅爸爸移居加拿大後成立咗個關文熹慈善基金，蔡太就負責幫爸爸搵合適嘅慈善項目，呢個活動咁有意義，蔡太當然要支持啦，佢仲搵埋老公嘅新華集團去支持添！