中環出更：工總換屆 新主席東非叉電

原來阿Roy喺換屆大會前一日，已一口氣打咗兩支防疫針，針口隱隱痛，但當選一刻興奮到乜嘢痛楚都拋諸腦後，滿場飛答謝嘉賓祝賀，卓妮都即場恭喜佢當選。

阿Roy登上工總主席寶座外，日前佢又獲頒銅紫荊星章，可謂雙喜臨門。

施榮懷（中）與德國寶老闆陳國民（右）及太子女陳嘉賢齊撐工總換屆。

經濟動力林健鋒（右）及黨友梁君彥都係工業廠家，當然要撐工總啦。

孫啟烈四代同堂遊韓

換屆當日，前主席孫啟烈（Cliff）、現任行政總裁邱達宏（Dennis）齊拍掌祝賀，工總名譽會長梁君彥（Andrew）、總商會立法會代表林健鋒（Jeffrey）及廠商會副會長施榮懷，都第一時間上前恭賀。當晚嘉賓仲有九巴金公主伍穎梅（Winnie）及「媽打」李麗娟。

Cliff卸下工總主席重擔後，心情勁輕鬆，佢話會組團暢遊韓國幾日，團員包括爸爸、媽媽、三個仔及孫兒，四代同堂一齊出發好溫馨。Cliff話，孝順父母好重要，佢希望做個榜樣畀兒子同孫兒睇。至於Dennis就計劃九月到意大利米蘭「朝聖」，狂掃至愛嘅Zegna西裝，佢預測月內歐元會回軟，暫時忍手唔「唱」歐元住。

卓妮