政情：劉燕卿唔知「紳士」做乜
乜紳士唔係男人嘅尊稱咩？最近港府七一授勳，消費者委員會總幹事劉燕卿（Connie）獲授勳為太平紳士，為女士們增光。Connie昨日喺消委會一個聚會上興高采烈同傳媒分享喜悅，佢話當佢媽咪知道佢獲頒太平紳士後，第一個反應係話：「乜太平紳士唔係頒畀男人嘅咩！」可能佢媽咪心目中嘅太平紳士形象，係戴住頂高帽、攞住支士的嘅男士，好難會聯想「紳士」係一位女士。
Connie話對太平紳士嘅具體工作亦不太清楚，稍後有個講解會就係介紹點去監倉巡視，佢有興趣之餘，亦擔心囚犯唔知有乜申訴，席上有人話Connie係消委會總幹事，屆時啲犯人可能會反映監獄裏頭啲煙太貴唔合理呢！不過Connie反應好快，即時話最好就禁煙啦。其實監獄裏面仲有其他嘢賣嘅，例如毛巾、潤膚霜等日用品，Connie可以勸啲犯人戒煙，佢斷不能叫佢哋唔好買其他日用品啩。總之太平紳士嘅實際功能，Connie都充滿好奇，想去探索吓。