政情：替補制玩殘棋哥詩姐
替補機制愈搞愈大鑊，港府班庸官閉門造車、罔顧民意自製嘅呢個超級炸彈，唔止炸到自己燶晒，連政界人士都被波及。尋日全國政協常委陳永棋同埋香港基本法委員會副主任梁愛詩出席一公開活動時被記者大包圍，詩姐更加走夾唔抖，認真被替補機制玩到殘晒。
由香港青年協會舉辦嘅《百年中國》大型多媒體製作首演，尋日下午舉行盛大嘅啟動儀式，城中政商名人齊集，歡度呢個慶祝辛亥革命一百周年而舉行嘅大派對，掀起民怨嘅替補機制成為焦點話題。棋哥話，如果港府喺去年議員辭職又重投選戰時提出修訂，應該就冇咁大阻力，但時機已經過咗去，依家政府要認真聽取民意，合理而又可以修改之處，咪要修改囉！佢話自己傾向自由黨嘅修改方案，但就唔贊成個別政黨搞事施壓嘅方式。
詩姐做過律政司司長，一聽到記者話有嘢要問，佢就好心水清咁話，「知道你要問乜嘢」，不過佢話答又唔係，唔答又唔係，所以索性都係唔講啦，連問佢暑假去邊度玩都唔講添！