中環耳目：鄭明明食子薑 保健養顏
「美容教主」鄭明明扮靚心得多，護膚都只係其次，最緊要食得健康。明明姐鍾情食子薑，每年趁子薑時令季節，柯打幾十擔薑炮製「私房薑」，食足八年，堪稱「子薑王后」。
六月子薑最嫩最美味，卓妮早前行經九龍圓方利苑，撞見明明姐買子薑食。原來佢係品薑專家，除咗買現成嘅，仲會返屋企炮製「私房薑」，每到六月中，佢例必吩咐工人到相熟街市狂掃子薑，佢指定用美國靚醋浸薑，一口氣炮製逾百樽「私房薑」，足夠吃一年，還與好友分甘同味。
每朝必嘗 過二不吃
每朝起身，明明姐堅持食薑，傷風感冒不藥而愈，皮膚仲白滑有光。食薑時間好講究，佢聽中醫師吩咐，「過二不吃」，即係下午二時後就不宜食薑，否則對身體有害無益。
除咗利苑子薑，老火湯都係佢至愛。利苑出品嘅花膠燉螺頭及茅根馬蹄煲豬踭滋補有益，最得佢歡心。因為家中外傭不擅煲湯，佢不時柯打利苑靚湯做外賣。有湯水滋潤，面色紅潤，真係敷Mask都無咁正！