中環出更：啟剛莊家彬同月同日生
世界真係小，富二代圈子中，都有同月同日生嘅沙煲兄弟。講嘅係莊士集團太子爺莊家彬（Albert）同霍英東長孫霍啟剛，兩人同係生於七月二日。日前兩人偶遇在北京，相約賀壽。
北京碰頭 相約賀壽
卓妮日前路經金鐘太古廣場，撞見壽星仔Albert睇戲。講起三十一歲牛一，佢話同啟剛好有緣。兩人本來各有各忙，殊不知一通電話，發現彼此原來都喺北京傾生意。蹺到極。Albert索性拉埋一位七月一日生日嘅老友，讓三位「七月之星」聚首一堂齊歎日本菜，老友們爭住埋單。
人緣佳嘅Albert，收到大堆生日禮物，包括靚衫及袖口鈕等。三十二歲生日嘅啟剛都唔執輸，獲多位好友祝賀。咁女友郭晶晶有無現身Party？Albert聽見，面有難色話：「呢啲嘢，你自己問番佢（啟剛）喇。」
咁啱得咁蹺，菁英會創會主席施榮忻都喺北京，同大女Victoria遊長城及故宮，佢話喺機艙內撞見Albert，先知對方喺北京賀牛一，返港後會補請食飯。