政情：夕陽政府一盤散沙
政府出手限制內地孕婦來港產子，食物及衞生局局長周一嶽一直緊跟政府立場，仲講到明政策目標係以享用產科服務嘅人國籍為準，即係話港人內地孕婦都會受到影響。呢項政策啱唔啱，到咗今日仲係有好多爭議，不過除咗坊間意見紛陳外，政府部門同樣鬼打鬼，行政會議召集人梁振英（CY）話政府應該為港人內地懷孕妻子提供特別安排，不過周一嶽尋日就繼續堅持「No Way」，明摑自己同僚一巴。
周一嶽尋日就解釋，話自己尊重CY嘅個人意見，不過政府已經深思熟慮過，仲批評自己同僚嘅講法偏離政策原則咁話。呢個政府真奇怪，限制內地孕婦來港產子呢項咁重要，兼且影響人口政策嘅措施，理應喺行政會議充分討論過先係，今次行政會議成員喺政策公布翌日就唱反調，唔通喺開會過程中搞到好唔愉快？
周一嶽批CY偏離原則
不過咁，查實今次已經唔知係第幾次，一班行政會議成員公開同政府政策唱反調㗎喇，好似工聯會會長鄭耀棠咁，佢喺○九年特首施政報告就曾經公開促請政府恢復定期賣地，並且限制土地用途同建成後樓宇嘅售價；呢啲招數今時今日睇起上嚟當然唔覺得新鮮啦，只不過大家唔好唔記得，煲呔曾當年喺施政報告好堅決咁拒絕恢復定期賣地㗎！
仲有仲有，以近期最為熱門嘅復建居屋為例，其實近幾年前，三位行政會議成員，包括張炳良、CY同鄭耀棠等都先後發表支持復建居屋嘅言論，擺到明就係同特區政府過唔去。以為已經夠多例子？未算，之前好似最低工資同公務員減薪等等嘅議題，都先有行會成員出嚟講個人意見，每次都令人懷疑，到底特區成個管治團隊喺度搞乜，如果事前有充分討論同醞釀，絕對冇可能會搞成咁。
當然，每次班行會成員行出嚟提出同政府相反嘅意見，都會聲稱係個人立場呀、唔會同政府政策或者行政會議規定有牴觸咁話，之但係一而再、再而三出現呢種情況，確實難免令人懷疑行政會議已經淪為吹水會，或者公道啲講，已經退化成一盤散沙。夕陽政府民望日益低迷，除咗煲呔曾無能之外，相信同領導層時不時鬼打鬼不無關係，成個政府個腦同四肢都不協調，咁就梗係冇可能做得好啦！