中環出更：啟山到處組隊 方便踢波
尋日有廿四支球隊齊集旺角麥花臣足球場，參加「巴黎2011無家者世界盃」慈善賽，籌款支持香港隊八月去巴黎參加比賽。無份落場踢嘅香港小型足球總會會長霍啟山，尋日連走幾場活動，最後都趕及到場做頒獎嘉賓。
啟山話，佢由細到大都鍾意踢波，依家佢香港、廣州、南沙周圍走，所以每個地方都有組隊，方便一得閒就可以開波。
啟山爸爸立法會議員霍震霆一樣腳法了得，閒時佢都會同爸爸切磋，不過依家工作咁忙，兩父子要對壘都好難。
蒙德揚牛一連踩幾場
信興集團副主席蒙德揚咁啱尋日生日，佢晨早同過百同事一齊入迪士尼參加跑步比賽，大家趁「中場休息」同佢食飯，飯後佢撲嚟球場睇兩隊同事比賽，夜晚再趕返去同屋企人、舊同學一齊慶祝。雖然全日不停趕場，但佢就覺得好充實，幾頻撲都係值得嘅。
同樣頻撲嘅社民連立法會議員梁國雄（長毛）有份落場，唔知係咪趕得滯，見佢上半場狀態麻麻，完場後，長毛直言自己已經五十五歲，年紀唔輕喇。