政情：女教師扮林D9似到十足
政制及內地事務局局長林D9林瑞麟有「人肉錄音機」之稱，每次到立法會發言都係不斷「播帶」，將啲聽落好似好有道理嘅歪理重複又重複。有團體尋日去立法會舉行模擬辯論，議題係「功能界別的存廢」，不幸抽中要扮林D9嘅女教師敬業樂業，形態、聲線、語氣都學足林D9，最重要嘅係連發言內容都學到十足十。
香港新一代文化協會主辦嘅模擬辯論像真度極高，其中「偽林D9」女教師李昉蓉，更照足真林D9咁，話港府已爭取咗二○一七及二○二○年普選時間表，二○一二年政改方案亦成為邁向普選嘅「紮實基礎」， 希望各黨派「放下爭拗」，「聚焦討論」如何為普選鋪路，呼籲大家「求同存異，達成共識」。
李老師一講完，現場部分人立即竊笑，相信係笑佢真係扮得太似。難為佢為人師表，竟然要扮民望極低嘅林D9。