西九新動力立法會議員梁美芬一向都花名多多，繼「鼠王芬」、「抽水芬」後，尋日又畀人改花名叫做「祟皇分」。
呢個新花名係選民力量代表人物「星屑醫生」歐陽英傑改嘅，佢話睇番政府建議嘅立法會替補機制，用「祟」、「皇」、「分」呢三個字就可以概括，令梁美芬無辜成為政府嘅犧牲品。
星屑醫生話，睇番政府個立法會替補機制，用「祟」、「皇」、「分」就可以概括。「祟」係指政府鬼祟，成個過程搞得咁倉卒，因為政府知道喺民間一討論就死火，一諮詢就爆煲。「皇」係因為要保障保皇黨嘅利益，皆因兩次補選都係泛民主派候選人大勝 ；至於「分」就係政府將民意簡單分化。
梁美芬聽到星屑醫生咁講都好無奈，惟有話︰「聽到歐陽英傑咁恨我，我明白嘅……我明白係有唔同意見。」跟住佢又話《基本法》講明香港唔可以搞公投，又話可以用發動總辭嘅資源做下民調喎。