中環出更：金勞詹飛天 陳南祿開工
今日係父親節，大男人向來不拘小節，就算點過節都冇所謂。已經做爺爺嘅立法會議員詹培忠（金勞詹），撇低家人獨飛新加坡會老友。馬會大董陳南祿（Philip）今日照常入馬場工作，一於做嘢當過節。不過，始終都係女人最有心思，教育局局長孫明揚太太鍾小芬就買咗件外套送畀老公，今晚再同囡囡孫仔食飯，等孫公暫忘近排嘅是非紛擾。
唔講唔知，金勞詹嘅大孫已經十七歲，潮州人家庭觀念重，又偏愛男孫，所以金勞詹對孫仔都好痛錫。不過，今年父親節佢唔喺香港，事關有位老友由澳洲飛去新加坡，所以佢專程飛去星洲同老友會合敍舊。咁會唔會去賭場玩番兩鋪呢？一向牙擦擦嘅金勞詹就笑笑口話：「敍吓舊啫！」
今日馬場有賽事，Philip自然行唔開，佢話父親節冇乜特別慶祝活動，寧願將家人互送禮物嘅錢捐畀慈善機構仲有意義。嚟緊暑假佢將陪囡囡去美國洛杉磯，視察心儀嘅大學，認真係廿四孝老竇。同樣係好老竇嘅青年事務委員會主席陳振彬，今日都會一家人喺屋企食飯共享天倫，佢細仔就將跑步比賽贏得嘅獎牌送畀爸爸做父親節禮物，呢份心意確係無價寶。
田二少收畫作Tee
新民黨副主席田北辰（二少）都收到禮物，就係佢兩個囡囡合作繪畫圖案嘅一件T恤。二少笑笑口話，佢好鍾意呢份禮物，並準備喺今日帶同一千二百件自家服裝品牌嘅T恤落區，讓其他為人子女都有機會喺T恤上繪畫圖案，向父親送上祝福。
近排孫公好閉翳，患腎病之餘又捲入僭建風波，但孫太話，孫公好樂觀，知道個腎有事後都未失過眠。至於父親節禮物，孫太幾日前已睇中咗一件外套，打算買嚟送畀老公，終於等到尋日減價入貨，果然係精叻嘅賢內助。
卓妮