殘疾也可做好一家之主
【本報訊】為人父親甚艱難，殘疾父親受限於身體缺陷，要好好照顧子女難上加難！香港失明人互聯會昨趁父親節前夕邀請多位殘疾爸爸分享照顧子女的苦與樂。五十二歲的張錦權出生時聽力正常，兩歲時懷疑飲奶時牛奶誤進耳朵而失聰，幸好三名子女全是健聽人士。張錦權與太太同為失聰者，靠手語與子女及其他人溝通，「最困難是當初照顧初生子女，夫婦二人聽不到子女哭喊，是餓還是不舒服一概不知，二人惟有輪流張大眼睛注視子女的表情，緊記要定時餵奶，每天僅有三至四小時睡覺休息。」
苦樂參半見親情
張錦權未有特別期望父親節禮物，只要子女能快樂生活便足夠。現年九歲的美寶十分「識做」，昨向爸爸送上一盒咖啡，「爸爸做嘢辛苦兼成日捱夜，送咖啡幫佢提神打氣。」
今年三十五歲的陳日豪兩歲時僅有正常人七成視力，至成年視力更急速衰退，現僅能分辨光影，「返工睇唔到字，睇唔到路，無奈地唔做嘢。○五年個仔出生，頭半年完全唔敢抱佢，怕大力整親佢，但後來太太要返工唔得閒，我就學做家務同照顧個仔，最難係餵佢食粥，惟有用手先摸佢下巴，將匙羹放喺佢下巴畀佢食，慢慢都學識幫佢沖涼、洗頭。」
陳日豪更分享與兒子相處的趣事，「同佢落街一放手就唔知佢去咗邊，後來買個無線電門鐘放喺佢身，一唔見佢就㩒鐘。有次佢自己丟低我走開，搵好耐都唔見我又喊又驚，最後自己返屋企，自此應承我一定會拖着爸爸。」
香港失明人互聯會昨成立殘疾人士子女助學基金，助他們參加培養天分潛能的課程。