望子成龍絕對係人之常情，就連一班名人都培養接班人，幫仔女鋪路出去見吓世面。我哋收到消息，據講幾位智經研究中心嘅理事，包括李金鴻、李國棟、金管局總裁陳德霖，仲有前高官梁永立，最近就喺跑馬地馬會搞咗個飯局，仲各自帶埋自己嘅公子出席，據講係想介紹畀香港青年聯會主席陳仲尼（Rock）認識，帶佢哋幾位公子加入青聯做義工。
大家都知，成功加入青聯嘅人，將來或有機會進身全國青聯，無論從商、定係從政都會順利好多，好多年輕政商界名人都以加入青聯為榮。
報料人透露，當晚除咗幾位名人同佢哋嘅公子外，就連盛傳會代表工聯會出選立法會新界西嘅葵青區議會副主席麥美娟（Alice）都在場。我哋尋日搵過Alice，佢話唔可以講咁多，叫我哋自己問當事人喎。Alice一向專注地區工作，唔通班公子哥兒都有興趣行呢條路？