政情：黃容根新抱走水貨？
民建聯近期醜聞不絕，先受僭建風暴正面吹襲，繼而再被揭嘥錢印利是封、紙扇同環保袋。被揭發屋企僭建天台玻璃屋嘅民記立法會議員黃容根，一波未平一波又起，有人爆料質疑根哥縱容新抱走水貨賺錢，仲講到言之鑿鑿。根哥今年是非咁多，唔知係咪犯太歲呢？
立會徽章過關避查
爆料人話，根哥二仔嘅老婆，用咗根哥名下部有中港車牌及立法會徽章嘅座駕，不時走iPhone、iPad、貴價紅酒、黃金甚至鑽石返大陸，避過兩地邊境人員嘅檢查。爆料人仲好仔細咁詳解每次走水貨嘅過程，以及一旦畀人篤爆時嘅甩身方法，真係疑幻疑真。
我哋向根哥求證，根哥笑笑口話，部座駕連司機都係佢嘅，新抱平時根本好少使用，一來新抱冇兩地車牌唔揸得，二來個司機平時已經要忙於接載根哥，只係幾個月一次會用來車孫女往返內地。根哥仲話，佢新抱以前做金融出身，毋須要靠走水貨嚟搵銀喎。