政情：鄧鉅明老竇餅派馬迷
一年一度嘅「太子珠寶鐘錶精英盃」賽事，撞啱喺嚟緊星期日父親節喺沙田馬場舉行，鬼馬嘅太子珠寶鐘錶主席鄧鉅明（Jimmy）一於搞搞新意思，喺當日下午茶時段將請一眾賓客食雞蛋仔同拉麵，又為入場父親準備咗一份名為「老竇餅」嘅禮物，其實係曲奇餅禮盒，包保大家玩得盡興、食得開心。
再送雞蛋仔拉麵
Jimmy尋日出席一個慈善機構頒獎禮時話，賽事當日中午食完自助餐後，三點半嘅下午茶將有連串驚喜，包括請咗雞蛋仔阿伯現場即整雞蛋仔，雖然呢位阿伯唔係近期全城熱話嘅雞蛋仔檔主「吳伯」，但Jimmy笑稱，請食雞蛋仔夠晒潮喎！至於拉麵就會由中環大排長龍嘅人氣拉麵店「豚王」派主廚到會。
咁啱尋日「豚王」老闆鄧振豪嘅爸爸鄧慶治都有到場，佢話前日邀請城中名人齊集「豚王」食拉麵共籌到十二、三萬元，全靠發起今次善事嘅保良局總理杜振源豪捐十萬元打咗底，先至咁成功喎。