政情：王光亞目無鐵三角?
前港區人大代表吳康民早前提出下屆政府由全國人大常委范徐麗泰做特首、唐英年繼續做政務司司長、行政會議召集人梁振英（CY）做財政司司長，組成「鐵三角」，言論令政圈議論紛紛。
唔通仲有第四「角」
不過，正喺香港嘅國務院港澳辦主任王光亞，尋日出席青年座談會前被問到對鐵三角有咩睇法，但掌管港澳事務嘅佢，竟懵然不知乜係鐵三角，只係矇查查講咗句「都挺好」。
之後王光亞可能知道自己講錯嘢，即時再聽清楚記者問題再答，話依家講鐵三角太早，又話「哪個鐵三角都沒搞清楚」。唔通佢真係唔識鐵三角？定係仲有第四「角」人選？睇嚟真係佢自己先知嘞！
既然中央未拍板，三位疑似特首候選人尋日喺歡迎王光亞嘅午宴上各自搵食。王光亞未到之前，CY爭取時間，花咗超過十分鐘先後同新鴻基地產副主席郭炳江、新世界主席鄭裕彤、恒基地產主席李兆基傾偈吹水。至於范太就同前全國人大常委曾憲梓傾偈。至於唐唐就遲到，抵埗後才與主家席各大巨頭逐一握手。