政情：工程匯起革命搶議席
暴風雨來臨之前總係特別平靜，好似明年立法會選舉，相信各個界別嘅人已經暗中做緊嘢，差在未浮上水面。今日我哋就拉工程界功能界別出嚟水面，睇吓工程界內靜悄悄地醞釀緊嘅革命。喺呢場革命擔當重要角色嘅，就係香港工程師學會，佢哋學會嘅核心人物已經起咗個爐灶，擬派人挑戰現任立法會工程界議員何鍾泰，據聞仲有前高官加入戰團爭位，可謂精彩絕倫。
話說香港工程師學會喺三月底正式註冊咗一間叫做「工程匯」嘅有限公司，成員包括學會主要領導層，會長朱沛坤擔任公司主席，公司兩位副主席就由學會兩位副會長陳福祥及蔡健權擔任。唔單止咁，水蛇春咁長嘅董事名單之中，仲有何鍾泰早年嘅老對手陸宏廣。不過，工程匯成立咁耐，一直未見佢哋有咩公開活動，相關嘅新聞近乎無咁滯。
有業界人士猜測，工程匯係為咗明年立法會選舉而成立，仲質疑既然學會必須政治中立，學會轄下成立嘅公司都應該政治中立。我哋問過朱沛坤，佢話搞「工程匯」嘅目的係想喺民生方面做多啲嘢，同時畀八十後、九十後多一個平台發表意見，同工程有冇關都無任歡迎。講講吓，朱沛謙仲表明學會掣肘較多，但工程匯只係一間公司，可以做到學會唔方便做嘅嘢，好似同選舉有關嘅議題等，成立目的真係呼之欲出。
另一邊廂，現年七十二歲嘅何鍾泰，自從○八年當選後確實諗過做埋呢屆就退位讓賢，點知拖拖吓，搞到今年初先至同幾位疑似接班人見面，但最後面試失敗，幾位疑似接班人無一個睇得上眼。話時話，何鍾泰話咗唔選已經好幾次，出年若再選到嘅話，佢就做議員做到七十七歲，提高咗立法會議員嘅平均年齡。
傳林鄭幕後操盤
此外，有傳聞話特區政府搵緊前高官參選工程界，擴大自己喺議會嘅勢力，矛頭仲直指發展局局長林鄭月娥喺幕後操盤，若然加上泛民主派都派人參選嘅話，真係打麻雀都夠腳囉！雖然立法會明年先至選舉，但單係一個界別內就已經七國咁亂，相信未來呢一年，呢類明爭暗鬥嘅戲碼將會喺各個界別隆重上演，大家擔定櫈仔等睇好戲喇！