中環出更：余鵬春夫婦義賣助樂施
位於中環怡和大廈嘅樂施商店，尋日舉行「名牌義賣周」籌款活動揭幕，裕華國貨董事副總經理余鵬春夫婦、立法會議員陳淑莊唔單止現身撐場，仲捐錢捐物做善事。平時好少跟老公一齊出席活動嘅余太Ida，原來一直忙於為樂施會做義工，幾乎日日去返工，廿年如一日。難怪余鵬春笑稱自己每個月都去幫襯幾次，其實佢係探老婆就真！
卓妮見樂施商店由名牌衣物、茶具擺設到益智玩具應有盡有，成個百貨公司咁。原來余鵬春夫婦多年來好支持樂施會，無論係店舖裝修、擺設到捐贈財物，佢哋都用盡心力。余鵬春每兩星期就去幫襯一次，試過買書、筆、領呔，甚至高爾夫球桿都有。Ida就更加唔話得，日日落舖頭幫手執貨，或者為名人捐出嘅二手名牌衫及袋定價等。
陳淑莊捐衣物
尋日余鵬春捐出一條心愛嘅Hermes靚呔義賣，樂施商店定價五百元。陳淑莊都捐咗一大袋衣物，但由於啲衫太皺未執好，所以佢拎住其他善心人士捐出嘅LV靚衫，呼籲大家做多啲善事。