中環出更：群星齊撐中大醫學院30周年
每年為香港提供唔少醫護專材嘅中文大學醫學院，上周六晚舉行三十周年晚宴，中大人紛紛出席，包括前校長、「光纖之父」高錕夫婦、前教統局局長李國章及金耀基、現任校長沈祖堯、校董會主席鄭海泉等，就連首個搵到德國腸病毒嘅深圳華大基因研究院理事長楊煥明都來港撐場，認真畀面。
高錕有講有笑
當晚高錕同太太黃美芸拍拖到場，大家紛紛上前握手問好，整晚有講有笑，顯得精神奕奕；期間泌尿科聖手「金刀梁」梁智鴻都有同高錕寒暄一番。卓妮轉個頭又見到前校長金耀基，佢話依家忙緊同內地嘅大學交流，研究如何管理好一間大學，事關今日嘅大學就等如國家未來二十年嘅樣子。
席間有位貴賓不得不提，就係逸夫書院校董周松崗嘅朋友、特登來港出席晚宴嘅華大基因研究院理事長楊煥明。楊煥明話，佢哋同中大有緊密嘅合作，又話依家發現嘅病毒係全球性問題，雖然德國搵到源頭係來自芽菜，但佢覺得依家只係啱啱開始，呢個病毒仲有好多後續問題。
明年增加學額
唔經唔覺，中大呢個香港醫護搖籃，三十年來孕育咗五千名醫生、護士、藥劑師及公共衞生人才，但本港對醫護界人才仍求才若渴。校長沈祖堯話，明年開始中大醫科收生比率會由每年一百六十個增加到二百二十個，以回應社會對專業醫護人才嘅需求。
醫護界咁缺人，難怪醫管局主席胡定旭一到場就拉住香港護士協會主席李國麟密斟，佢仲講笑話近排護士唔夠人手，所以要傍實李議員喎，身旁嘅李太都幽默話，呢排老公見胡定旭仲多過見自己。
其實當晚肥胡同過好多人密斟，卓妮就見到一幕搞笑情景，就係佢同前高官李淑儀傾到皺晒眉，唔知有乜重要議題呢？
卓妮