特首選舉前哨戰展開，雖然三大疑似特首候選人近日動作多多，但政圈一直流傳「還有其他人」，選過第一屆特首嘅九倉主席吳光正，傳聞亦係人選之一，但吳主席尋日出席九倉股東大會時，就斬釘截鐵話無意再參選喎。
論參選經驗，吳主席點計都係大師兄，再參選並唔出奇，尋日成班記者圍住佢「逼供」，佢除咗話無意再參選特首外，有記者叫佢品評吓三大疑似候選人，佢就耍太極話：「今日係九倉股東會喎！」擺明置身事外等睇戲。
恒隆集團主席陳啟宗（Ronnie）都拒絕加入戰團，尋日出席「香港明天更好基金」記者會時，被問到會否落場選埋一份，Ronnie自嘲未夠班：「第一，我冇咁叻；第二，我冇咁蠢！」佢又笑言唔夠架勢，沒有疑似候選人搵佢畀意見。對於《基本法》第二十三條立法問題，Ronnie就話冇研究過，唔敢亂噏。
特首選情，各方人馬已在暗暗部署。港區全國政協委員尋日同中聯辦官員會面，亦談及二○一二年特首選舉事宜。中聯辦官員呼籲佢哋登記做選民，以便符合資格參與特首推選委員會，但官員就冇談及要求佢哋配合港府施政，亦冇談及下任特首嘅條件。