政情：肥胡拒查種票惹不滿
醫管局主席胡定旭坐正香港總商會主席只係啱啱一年，但早前就爆出「種票疑雲」，傳聞有人一口氣提交四十份申請表格做會員，被質疑新增嘅會員可以喺呢兩年多場選舉起重要作用。本報尋日就收到多名自稱總商會會員投訴，不滿肥胡拒絕調查疑似種票事件，並要求掌管會員事務嘅常務副主席周松崗下台問罪咁話。
自稱總商會員促周總下台
一班自稱總商會會員嘅人士，早前去信周松崗，指控佢做主席嘅會員關係委員會，容許有人提交四十封申請信做會員，但係原來呢個委員會從來都無開過會，所以要求周松崗同肥胡要獨立調查呢件疑似種票事件，但二人拒絕。
呢封信仲話，周松崗做呢個會員關係委員會主席，係未經總商會確認，認為周松崗濫用職權、誤導會員，認為佢無資格代表總商會，要求佢喺七日之內問責下台，否則會採取適當行動。不過，直至尋日截稿前，肥胡都無回應呢件事，而總商會立法會議員林健鋒就話呢封投訴信不盡不實，但都係不願多談。