政情：民主阿婆家族爆爭產風波
民主阿婆陳方安生嘅媽媽方召麐已經入土為安多年，點知道最近至傳出爭產風波。最近有傳媒報道方家是非所涉及嘅爭產內容，除咗平常人都會爭嘅房產之外，仲涉及幾千幅字畫同國畫，估唔到家產爭起上嚟，真係乜都無情講，乜都有得爭。
方曼生：一早分好晒
方召麐生前係畫家，最近掀起嘅是非，包括方家兄弟姊妹之間有人質疑到母親遺下嘅幾千幅畫作嘅去向，仲講到屋企有人攞咗啲畫，又唔好好處理，之後仲唔知去咗邊，又話家中投訴無門，惟有將家事訴諸傳媒。
此外，報道又話方老太遺囑將舊居送畀其中一個仔，但由於業權係長命契，故未能順利接收遺產，講到咁值錢嘅嘢，當然又有交嗌。
方家長子方曼生尋日回應我哋嘅查詢時，就斬釘截鐵否認有關報道，佢話總之家產一早已經分好晒，喺邊？「唔通我講畀你知喺邊個夾萬咩？」
至於事件主角之一，即係民主阿婆陳方安生，就話乜都唔回應嘞。