政情：蘇錦樑搭嗲阻住立會轉
「葛輝風波」愈揭愈臭，事件主角前政府資訊科技總監葛輝尋日上立法會爆大鑊，同涉事官員公開對質，並衝住同佢不咬弦嘅上司、商務及經濟發展局常秘謝曼怡，唔少議員狂問雙方事件始末。葛輝早已表明事件同該局署任局長蘇錦樑（Greg蘇）無關，但佢喺會議上不斷插嘴做「架樑」，激到班議員紮紮跳，叫佢收聲咪阻住個地球轉，呢啲咪自討沒趣囉！
Greg蘇喺會議起首，已即時嚴詞炮轟葛輝，話佢言論不盡不實，令人遺憾。其後喺多名議員質問謝曼怡有否向葛輝作政治施壓時，佢又聲言要出嚟「講番句公道說話」。唔少議員對佢不斷插嘴都感到不滿，民主黨李永達更直接叫佢收聲：「我問謝曼怡唔係問你呀，你唔好嘥我時間啦，我得五分鐘問問題咋！」
Greg蘇尋日可能有感身為「署任」局長，好應該扮吓大佬幫下屬，可惜一股熱血卻換來議員冷待。班議員咁唔畀面佢，唔知係咪因為心知佢升唔到做局長，睬佢都嘥氣呢？