政情：潘潔僭建死撐以笑遮醜

身為問責官員，政治敏感度不足，竟然僭建寓所嘅潘潔，尋日凌晨透過新聞處出稿，回應僭建醜聞，話正如佢喺五月十六日回應傳媒報道關於佢寓所問題時，佢話寓所出現嘅問題，責任都在佢，所以佢有責任做好，包括購入單位後裝修過程中嘅疏忽。而佢喺事件後已經即刻委託認可人士跟進，認可人士亦都已經聯絡相關部門，確保有關工程依法進行。

重複官樣回應

潘潔講來講去都唔肯承認僭建，咁嘅官樣回覆，傳媒當然唔會收貨啦！尋日朝早一大班記者走去等潘潔返工，再追問佢有關僭建嘅問題，最關鍵係有關僭建物係咪佢購入單位後先至興建。

潘潔只係用咗一分鐘時間笑笑口咁答咗三條問題，有幾大誠意，可想而知。不過，如果答得好，一分鐘回應都可以得到市民諒解，可惜佢嘅答案都係重複又重複咁背番佢嗰份官樣回應。

記者於是單刀直入，問潘潔係咪做咗問責官員後先至僭建？點知佢九唔搭八話，寓所出現嘅問題，責任都在佢。呢句耳熟能詳嘅對白，已經聽咗好多次，真係你唔厭我都厭。潘潔嘅上司、身處北京出席國際環保展嘅環境局局長邱騰華，亦都走唔甩，被追問潘潔僭建問題，佢話聽到潘潔喺香港發表嘅聲明，係恰當嘅。有咁嘅下屬就有咁嘅上司，邱騰華同樣答咗句廢話就離開。

其實地政總署嘅高空拍攝圖像清楚顯示，潘潔間屋○九年仍然乾乾淨淨，後來先至有間天台玻璃屋出現，擺明係潘潔○九年八月買入後先至僭建，鐵證如山，當時佢已經係問責官員，竟然知法犯法，罪加一等。事到如今，作為首位被揭發僭建嘅問責官員，潘潔貫徹始終，死口唔肯認住所僭建，反映佢份人同呢個夕陽政府一樣冇承擔之餘，亦證明「官」字兩個口，乜都係政府講晒同啱晒。