中環出更：恒生巨型掛氈訴說發展史
作為香港出品嘅恒生銀行邁向八十周年，為紀念呢個大日子，恒生就別出心裁設計咗一幅巨型掛氈，以色彩及圖案道出香港社會同恒生嘅發展脈絡，尋日起懸掛喺中環恒生銀行總行嘅博愛堂宴會廳。恒生銀行副董事兼行政總裁梁高美懿好欣賞呢幅掛氈，仲坐喺掛氈前留倩影，驟眼睇梁太好似融入掛氈嘅圖畫內，成為恒生歷史嘅一部分。
記錄80年歷程
卓妮得知，巨型掛氈面積約十五平方米，由員工集體構思圖畫，再委東莞廠商以人手逐針逐線製作，毛冷顏色超過一百種，構成近三百種顏色。由挑選毛冷、染色至編織，工期超過一百天。至於掛氈構圖，從左至右，記錄恒生嘅發展歷程，由一九三三年恒生銀號開業時位於上環永樂街嘅戰前建築，至今位於德輔道中總行嘅歷史點滴。
梁太話，恒生由一家只有十一人嘅小銀號，發展到今天擁有一萬名員工嘅世界級銀行，同港人一起成長，恒生團隊將來亦會繼續努力，與時並進。卓妮順帶講講恒生總行廿四樓嘅博愛堂宴會廳，每年招待過萬人用膳，最出名係蛇宴同特色中菜，以新派煮食風格聞名。