中環出更：六嬸痛風發作輪椅代步
尋日又公布一年一度嘅「邵逸夫獎」得獎名單，邵逸夫獎基金會主席方逸華（六嬸）以主人家身份出席發布會。六嬸平時行得走得鬼咁精靈，但係尋日竟然搞到要坐輪椅出席，點解搞成咁？原來六嬸左腳痛風症發作，病到行唔到路，但係佢就叫大家唔需要擔心，仲好鬼馬咁講笑話：「坐輪椅好舒服，有人推」，認真係大吉利是囉！
出席邵逸夫獎發布會
六嬸除咗上台時勉強企得起身之外，全程都係坐住輪椅。六嬸話，前日都仲同六叔邵逸夫去半島酒店歎茶，點知前晚隻左腳就開始痛喇，好在有六叔關心佢，聽落真係好甜蜜。雖然六嬸一直話自己唔係好辛苦，但見佢去洗手間時要三個人扶住佢，隻左腳一落地就即刻痛到「殊殊」聲叫，睇嚟病情都唔輕。
楊振寧：民主無助科研
今年邵逸夫獎都係由外國學者橫掃，係咪中國冇叻人呢？評審委員會主席楊振寧就話唔可以咁講︰「香港得七百萬人，全世界有幾十億，相對一定少人拿」，而且外國喺科研上喺三、四百年前已經起步，好似有牛頓、加俐略等，但係中國就係近幾十年先發展，所以遠遠落後於人一啲都唔奇，仲話未來十年、廿年要追得上絕對冇問題喎。
有人話中國要有民主先有好嘅學術研究，楊教授就話︰「唔知口中講嘅係咩民主，民主同研究關係唔大，蘇聯唔係好民主，科學發展都好快！」佢仲話如果要內地政治體制改變，反而會令學術發展拖慢，因為社會需要時間磨合，對學術發長不利喎。
今年邵逸夫獎設三個獎項，天文學獎由恩里科‧科斯塔（Enrico Costa）及傑拉爾德‧菲什曼（Gerald J Fishman）獲得；生命科學與醫學獎就由朱爾斯‧霍夫曼（Jules A Hoffmann）、魯斯蘭‧麥哲托夫（Ruslan M Medzhitov）及布魯斯‧比尤特勒（Bruce A Beutler）；德梅特里奧斯‧克里斯托多羅（Demetrios Christodoulou）及理查德‧哈密頓（Richard S Hamilton）就獲得數學科學獎。