探射燈：褻瀆神明折福招惡果
最近先後發生廟宇及教堂爆竊事件，玄學界人士認為「善有善報，惡有惡報」，賊匪偷走善款等同褻瀆神明，分分鐘招來惡果，結果將會得不償失，並呼籲賊匪回頭是岸。
「今世偷咗下世還」
「偷香油錢，死後落地獄可能畀人斬手斬腳，或者畀滾油炸，中國人好信因果，你今世偷咗，下世一定要還！」玄學家司徒法正指出，盜取香油錢對神明極不尊重，後果可能很嚴重。他開設的廟宇及佛殿，過往亦曾遭偷竊，「曾經有人偷香油錢後，無論婚姻、工作、健康都好唔順利，最後因為太驚，返嚟還番啲錢畀我哋。」
玄學家李丞責亦指，賊人將善款據為己有，中飽私囊，罪加一等，「偷善款係非常損德行為，阻住行善嘅人積德，會折自己福氣，就算依家係屬於行緊好運嘅時間，都唔會有運行。」他呼籲賊人安貧樂道，要「守德行，積福氣」，才有機會行運。