政情：蒙德揚封李娜做偶像
成就咗中國十三億人網球大滿貫冠軍夢嘅李娜，前晚喺法國嘅比賽風姿，吸引咗中港唔少人圍住個電視機捧場，無得親身去法國支持偶像嘅信興集團副主席蒙德揚（David）都特登出街睇電視捧場，至於不諳網球嘅行政會議成員梁智鴻太太馮令儀就招呼咗親友返屋企睇波，一齊見證盛事。
David直言前晚之後封咗李娜做偶像，佢話○八年已經喺北京睇過對方比賽，可惜今次無時間飛過歐洲，無緣親身見證歷史一刻，佢前晚特登早啲食晚飯，然後去酒吧同其他球迷一齊睇波。讀書時期都有打網球嘅David，笑言多年無打，依家嘅球技「太好」，所以無咩朋友同佢打，惟有做觀眾支持。
梁太就笑言將第一次畀咗李娜，事關前晚之前佢都未欣賞過任何網球賽，咁啱有啲親戚屋企無得睇直播，嚟佢屋企睇波，佢先至第一次睇。梁太屋企得書房部電視機有得直播，佢話幾個人一齊圍住部十八吋嘅電視，雖然逼啲，但氣氛好好。