政情：田二少開檔唔請何君堯
矢志喺新界西參加立法會直選嘅新民黨副主席田北辰，佢個屯門辦事處尋日舉行開幕禮，請到鄉議局主席劉皇發做嘉賓，不過就冇請屯門鄉委會主席何君堯，唔通因為對方係潛在對手所以唔請？田二少解釋，自己一向尊重鄉紳，發叔有足夠分量代表所有鄉委會喎。
身為鄉議局顧問，田二少尋日為近日最熱門嘅僭建問題獻計，佢話僭建係全港性問題，並非新界村屋獨有，政府應訂出日期，凡係呢個日期前興建，而又冇結構危險嘅僭建物就容許繼續存在，不過就要補番地價或者租金，轉手亦要先拆去僭建物，咁樣先夠公平。喺政府同新界人傾緊如何理順丁屋僭建物嘅時候，由呢位鄉議局嘅半個自己人提出呢個建議，可能係最適合不過，因為佢唔係新界人，無直接利益牽涉。
除咗田北辰外，尋日人民力量立法會議員黃毓民喺元州邨嘅辦事處亦正式開幕，係人都知道人民力量有意狙擊扎根深水埗區嘅民協，佢尋日透露，個個有民協嘅選區都會派人落去玩吓，雖然未齊腳，但會繼續努力搵喎。