政情：梁亮勝幫鄉里勁豪氣
香港嘅客家人有成百萬咁多，咁大個族群，當然都有自己嘅聯會團結埋一齊啦。嚟緊十七日，由來自六個大城巿嘅香港客家人組成嘅香港廣東客屬社團聯合總會就會喺會展舉行第一屆就職典禮，尋日佢哋嘅會所仲舉行開幕儀式。
佔地七千呎嘅總會會所，位於主席梁亮勝喺觀塘嘅商廈頂樓，梁主席免租三年之餘，仲送埋裝修，即係差唔多送咗五百萬畀總會。梁夫人古爾夫笑笑口唔肯講，但透露裝修費都超過百五萬。
身為客家之子嘅曾智明就兼任副主席同秘書長，佢哋家族嘅金利來仲包起所有會員嘅紅呔同絲巾添，佢話樂意為鄉里做多啲嘢，尋日仲擔任司儀，同鄉里用客家話溝通。佢話六個地方嘅客家話都有少少分別，但大家都會聽得明，至於佢兩個小朋友，就只係識「食飯」同「瞓覺」兩個詞語，因為佢哋最鍾意關心爺爺曾憲梓食飯未，臨瞓前又會攬實爺爺問瞓覺未？認真抵錫。