政情：潘佩璆人氣低棄選立會？

潘醫生個議員辦事處尋日開幕，呢個新嘅辦事處位於有「富貴公屋」之稱嘅華富邨，仲係工聯會第一個喺港島開嘅議員辦事處。潘醫生話，呢個選址對佢有特別意義，因為廿年前佢喺瑪麗醫院返工時，病人多數都係南區居民，當然唔少得華富街坊啦，依家就用另一個身份為街坊提供服務喎。

不過，睇怕個辦事處佢都唔用得好耐喇。因為最近有話工聯會想原來喺新界西當選立法會議員嘅王國興，喺下屆移師港島參選，今次喺華富開檔都係幫王國興鋪路，潘醫生要講拜拜。又係嘅，睇吓最新嘅香港大學民調，市民對六十位立法會議員嘅認知度中，潘醫生排到第四十八，再前啲嗰兩次更分別排第五十七同五十四位，幾乎冇人知。

潘醫生都話，以工聯會規矩，代表工聯會做勞工界議員，只可以做一屆，佢發現市民好難接受一個專業人士做勞工界代表，佢又為人低調，入立法會有一定難度。加上佢就算參加直選都唔會放棄做醫生，有啲朋友都畀意見，話佢唔知做唔做到咁多嘢。

不計較參選名單排位

潘醫生仲話，參與議會係一個好好嘅經驗，但係佢冇咩特別要求，仲話「喺（參選）名單度排第一個定係最後一個都冇所謂，就算做義工幫手拉票都係參選㗎。」講到咁白，都唔使問佢係咪決定咗唔選下屆立法會啦。

但係王國興返嚟港島嘅話，到時新界西嘅議席咪危危乎﹖潘醫生就話，新界西都有一班區議員，加上王國興經營咗一段好長嘅時間，參選隊伍已經好強，就算王國興嚟港島，佢哋都夠實力咁話喎。

王國興尋日都有出席潘醫生辦事處嘅開幕禮，不過佢就唔認工聯會係幫佢鋪路，又話會做好新界西先。雖然港島有唔少泛民嘅支持者同中產人士，走基層路線嘅工聯會有好大挑戰。不過王國興就話，佢哋喺港島都有五、六萬會員，都唔係冇機會咁話。