中環出更：名人雲集馬場撐港大校慶
香港大學今年一百歲，慶祝活動可謂一浪接一浪，尋日輪到去沙田馬場舉行「香港大學校友會百周年挑戰盃」，卓妮見到唔少新知舊雨都有到賀，仲有唔少港大支持者出現添，絕對係名人雲集。
陳南祿曾執教鞭
身為港大之子嘅恒隆董事總經理陳南祿（Philip），除咗擁有港大學位，原來佢仲喺港大執過教鞭，真係失覺晒，佢一九八四至八八年喺港大教過四年MBA課程，至於佢係咪想將書本嘅知識直接發揮喺商場上，所以最後放下教鞭從商呢，Philip就只係展開佢嘅招牌笑容，無答。
同樣係學以致用嘅仲有畢業於七三年數理科嘅澳博行政總裁蘇樹輝，好多人話佢依家投身博彩業適合不過，但佢就謙稱唔夠太太鄭妙冰叻，事關蘇太婚後先入讀港大，用咗十年時間讀咗三個學位返嚟，仲係港大第一個比較文學博士添。
叻女嘅仲有依家喺港大讀緊嘅賭王四太梁安琪長女何超盈，佢本來喺英國求學，為咗照顧家人先返嚟讀大學，仲憑自己嘅實力考入港大，咁乖女，難怪尋日四太寧願趕啲，都要喺過澳門出席龍舟比賽前陪愛女入馬場支持盛事喇。
四太港澳兩邊走，忙到飛起，生活較悠閒寫意嘅港大舊生就有前亞視主席張永霖，佢尋日同太太Silvia一齊入馬場撐母校，佢有乜大計？咪兩公婆遲啲去溫哥華放假囉。
徐立之嘴角生瘡
講咗咁耐，徐立之校長喺邊？哦，原來佢同港大校董會主席梁智鴻密密斟。徐校長嘴角黐咗塊膠布遮住粒凍瘡，梁醫生話，呢啲過濾性病毒，個個體內都有，遇啱抵抗力差就會出嚟。呢排港大咁多活動，徐校長你得閒就要抖吓啦！
卓妮