政情：愛女遭投訴范太代伸冤
初生嬰兒深切治療病房（NICU）人手嚴重不足係人都知，全國人大常委范徐麗泰嘅愛女范凌華喺伊利沙伯醫院NICU做醫生，早前就係因為工作過勞告咗一個月病假，不過佢嘅同事可能做到火滾，來電本報投訴，話范凌華放假唔使交請假紙，質疑人大常委個女有特權。
做事向來均真嘅范太聽到呢個傳聞就更加火滾，佢尋日唔喺香港，但就透過發言人話，自己只係一個醫生嘅媽媽，從來無運用過乜嘢影響力，而女兒一直都盡忠職守，就算沙士期間，都無告過假。佢仲話，女兒今次的確因為工作過勞病咗，告咗一個月假，但依足手續向直屬上司告假，放假完畢返工，就即刻向上司交假紙。
范太曾經將自己嘅一個腎，捐咗畀范凌華，佢有幾錫個女可想而知，而個女就係因為自己曾經患過大病，至立志做醫生，但就因為曾經換腎，身體唔算好強壯。范太希望社會唔好發放呢啲搞特權嘅流言，打擊青年埋頭為自己嘅專業而努力。