政情：周澄暗踩任亮憲獲放生
早前捲入非禮強姦案嘅「維園阿哥」任亮憲獲警方不予起訴，佢嘅前女友周澄尋日出席活動時，起初就話唔方便再評論，但又忍唔住講兩句話︰「我就覺得有做就有做，冇做就冇做囉」，又話全世界呢啲案件都好難有證據去保障女事主，好難去證明有強姦或者有非禮，希望啲女事主過得好啲喎。佢咁講法，係咪暗寸警方證據不足，先至放生任亮憲呢？
大庭廣眾捽腳趾
去咗菲律賓實習半年嘅周澄今個月初先返嚟香港，近日已密密蒲頭，尋日就出席香港傑出學生協會青年論壇。早前有傳周澄會加入社民連，佢就話依家喺社民連秘書處做兼職，只係過渡性質，一搵到工就會走人，所以唔會加入社民連，亦對政黨及從政冇興趣，都係鍾意喺非牟利機構或民間團體度做事喎。
講番尋日個青年論壇，同場仲有公民黨黨魁梁家傑，但袋巾傑發言時，周澄神色凝重，唔通講緊啲敏感議題？望落枱底，原來周澄喺度用右腳幫左腳捽腳趾。其實唔單止周澄，台上兩個學生哥都掛住咬耳仔，莫非袋巾傑發言悶親大家？