政情：糧油王子教溝米煲靚飯
有「糧油大王」稱號嘅港九罐頭洋酒伙食行商會副理事長李廣林，家族企業通泰行做食米、罐頭入口生意幾十年，依家已經由第三代傳人、廣林叔嘅二仔李豐年（Kenneth）接班。Kenneth日前現身一個台灣米製品展售會活動，原來佢五年前已率先入口台灣靚米，仲教人將泰國米溝台灣米煲飯，既具創意又夠新潮，不愧係糧油王子。
Kenneth話，香港人食慣泰國米同中國米，但泰國米食落冇飯味，中國米就太硬，台灣米夠黏稠，所以將台灣米溝埋泰國米或中國米一起煮，就可取得各種食米嘅優點，令到米飯更加完美。至於混合嘅比例如何，佢就好專業咁話，唔同時節嘅米有唔同嘅口感，要按每個人嘅口味決定喎！
Kenneth又話，台灣米嘅質素好但價錢貴，約比泰國米貴兩成，比起中國米就貴約七成，呢個係佢教路溝米食嘅另一原因。唔講唔知，原來香港係台灣米最大嘅出口市場，今年頭四個月就勁增兩倍添！