政情：何建宗寸爆煲呔曾

環評制度行咗咁多年，今次忽然爆大鑊，何建宗相信係同「有香港特色的環境影響評估制度」有關，話說制度嘅核心係「防患於未然」，盡量減低工程對環境影響。不過，香港發展速度「舉世無雙」，相比北美地方做一次環評搞成六、七年，香港人未必收貨，所以當初訂立制度嘅時候，無全盤照抄外國嗰套，本來嘅「公眾參與」亦惟有變成「公眾諮詢」。

斥將事件政治化

原本將價就貨唔係問題，而且靈活變通係香港人嘅精神，但制度有缺陷，就必須與時並進，作出改善。何建宗以今次港珠澳大橋為例，說明制度被「政策或政治決定」牽住鼻子走，有咗政治決定先至做環評補飛，難免處處受掣肘，加上依家嘅環評制度唔包括對社會同健康影響嘅評估，根本唔能夠完全「防患於未然」。

講咗咁耐，何建宗帶出咗一個好好嘅問題，就係每個公民都有權就法律同環保問題提出意見，先至係「公眾參與」精神所在，而大橋官司唔想輸都輸咗，根本無必要將件事擴大成「政治事件」。佢話美國當年推出環評制度時，也曾經歷十多年不斷有人提出司法覆核嘅「陣痛」，雖然經濟代價好沉重，但當所有法律觀點釐清後，環評便逐漸走上坦順嘅道路。

何建宗又話，希望大家應該冷靜落嚟，用「平常心」面對今次或以後可能提請嘅司法覆核，不妨以正面嘅眼光去評價官司帶來嘅法律釐清作用。聽完何建宗見解確係一矢中的，全面反駁煲呔曾鬧人濫用司法程序去阻撓基建工程嘅言論，反映煲呔曾十足冇心臟兼冇靈魂嘅機械人，睇嚟搞科技嘅何建宗應該幫煲呔曾裝番個「平常心」先至有得救。