中環出更：四太速遞美食 燊哥飽口福
賭王何鴻燊近期胃口大開，經常同家人外出食飯共享天倫外，仲叫外賣美食刺激味蕾。前晚四太梁安琪出席喺中華廚藝學院舉行嘅「慈善天王宴」，未等上菜就急急腳走人，咁趕，原來係親自速遞官燕雞翼返屋企氹燊哥開心。
由飲食天王頒獎機構主辦嘅慈善晚宴筵開八席，為保良局籌款。來自十多間名店嘅星級大廚駕臨，即場炮製撚手名菜，吸引多位保良局高層及城中善長捧場。當晚捐得最豪最闊綽嘅，就係身兼晚宴籌委會主席嘅保良局副主席梁安琪，送上一張四十四萬元支票，全場嘩然。
柯打官燕雞翼
話明係「天王宴」，佳餚精選十幾味，但四太連第一道菜都未試就急急腳走人，期間不停追問職員「燒好未？」卓妮以為佢為食啦，原來係四太見會場有「名人坊」行政總廚鄭錦富（富哥）助陣，即場柯打八隻官燕雞翼外賣，打包返屋企加餸氹燊哥開心。咁體貼，抵燊哥咁錫佢。
除咗官燕雞翼外，四太仲點名盛讚鏞記酒家嘅燒鵝頂呱呱，仲幫襯咗廿幾年添。燒鵝脾並非四太首選，鵝背肉更得佢歡心，貪啲鵝背肉質嫩滑，鵝味鮮甜。四太讚到出口，身旁嘅鏞記老闆甘健成，即時眉開眼笑，更大爆燊哥係鏞記常客，最愛一味紅燒斑尾翅喎！
卓妮