政情：蘇錦樑忽然「坐正」瘀到爆
前商務及經濟發展局局長劉吳惠蘭因病辭職已有個多月，政府至今仲未搵到更合適接任人選，令任內屢爆醜聞嘅「次次選」副局長蘇錦樑（Greg蘇）有望爆大冷坐正，並盛傳會喺日內公布，以便佢以正印局長身份，到美國出席明日舉行嘅亞太經合組織部長級會議。
官員名單無「署任」
不過，近日政界又傳嚟消息，話Greg蘇嘅上位大計出現阻滯，有傳話個別工商界人士強烈反對佢做局長，甚至有說Greg蘇個名早已交咗上北京，但中央遲遲都未批，有可能被「彈票」。
尋日Greg蘇到立法會工商事務委員會講解專利註冊制度問題，由港府提供嘅出席官員名單，就寫咗佢係「商務及經濟發展局局長」，冇咗「署任」兩隻字，但同場嘅另外兩名知識產權署官員，職稱就有署任字樣，唔似係手民之誤。唔通港府都預咗Greg蘇尋日正式坐正，但最後中空寶唔記得更正？Greg蘇畀議員問及有乜玄機時，就苦笑話：「關於玄機嘅問題，呢個唔係我個人決定嚟嘅，所以唔方便作答。」表現得相當無奈。