政情：單雞逃過旅巴炒車一劫
每逢節日，各大政黨都會搞搞活動，同居民聯誼一下。民主黨喺剛過去嘅星期日母親節搞咗個旅行團，同成班媽媽一齊慶祝，點知呢個團發生交通意外，連導遊都受傷入院。有份參加呢個團嘅黨副主席
雞單仲偕話，意外嗰時佢唔喺車上，所以托賴無事。母親節搞到有交通意外，各位母親大人受驚啦。
尋日雞喺facebook畀人標籤咗落旅行團嘅相簿中，相簿內文話呢個團嘅旅遊巴遇到交通意外，導遊受傷，警察亦查咗個幾鐘，旅行團上半日嘅節目受到影響。雞同我哋講，其實當時佢唔在場，事關佢負責喺鯉魚門向媽媽們獻花，而據佢所知，嗰位導遊雖然受傷入院，慶幸傷勢並唔嚴重，都算係有驚無險啦。
至於雞當日做完嘢之後，就接埋外母同媽媽一齊出街食飯，仲代兩個囝囝送咗康乃馨畀老婆。其實慶祝節日又唔一定要大費周章嘅，講到尾，最緊要係有心。