政情：美孚業主為林鄭「祝壽」
聞說發展局局長林鄭月娥今個禮拜五生日，相信「好打得局長」嗰日大部分時間都應該要喺工作中度過，之但係，林鄭局長唔使怕無人同佢慶祝五十四歲生日喎，事關一班美孚新邨嘅小業主尋日事先張揚，話到時會帶埋大大個生日蛋糕同生日卡去政府總部同局長賀壽咁話！
班小業主對局長「咁好」梗係有原因啦，查實佢哋賀壽為次，踩場示威反地產霸權先係真正目的。美孚新邨第八期隔籬石油氣庫原址變住宅嘅風波，發展局多次發稿解釋係獨立項目，無損害美孚小業主權益，但小業主堅持唔接納發展局嘅講法，反指當局係以謊言遮掩錯失同推卸責任囉。
呢班美孚居民曾經發動千人瞓街行動，又好幾次去原發展商旗下嘅珠寶店示威，都算係少少激進，加埋新發展商入稟禁制居民阻地盤動工嘅官司，啱啱好喺呢個禮拜五朝早開庭處理發展商民事索償，究竟居民嗰日下晝會點樣同局長「慶祝」，就真係好難估喇！