中環出更：莊偉茵搞慈善騷籌逾百萬
尋日係佛誕，城中名人盡情發揮慈悲心，齊入馬場撐香港傷健策騎協會盃賽，話咁快為協會籌到過百萬元善款。國泰航空企業事務董事莊偉茵（Quince）係協會嘅公關及籌款委員會主席，今次首次為協會做大騷，老公黃楚權同一眾名人朋友都畀晒面撐場，幫手買枱、捐禮物做善事，話咁快籌到一百萬元，Quince都話好滿意成績。
利子厚憂獅城拋離香江
香港傷健策騎協會係馬會慈善信託基金贊助，佢嘅會長等同馬會主席，即係施文信，可見關係幾咁密切。馬會大董中，利子厚係傷健策騎協會嘅體育委員會主席。利子厚尋日都有現身撐場，佢早前去過新加坡，當然唔會錯過當地嘅美食。新加坡競爭力強，同香港拍住，香港偶一不慎，就會畀佢拋離，利子厚話除咗關注競爭力，佢覺得要特別留意嘅，反而係息口上升嘅問題。
鄭錦鐘新西蘭賽馬奇遇
保良局副主席鄭錦鐘都入場玩吓，佢話喺新西蘭養咗三年嘅愛駒最近運到香港，依家仲隔離緊，預計明年馬季就可以出賽。佢同卓妮講起段趣事，話說隻愛駒曾經喺新西蘭贏過頭馬，不過當地冇拉頭馬呢回事，馬會只畀一張馬兒衝線嘅相畀馬主留念就算。不過佢睇真啲張相，發現隻馬根本唔係佢嘅寶貝，原來佢隻愛駒跑內檔，只係贏咗一個馬鼻，所以畀跑第二嘅馬仔遮住晒，連騎師都唔見影。哈哈！
平等機會委員會主席林煥光同太太都喺度，林煥光做過奧運馬術公司行政總裁，當年搞殘奧馬術有晒經驗，自然好認同傷健人士透過策騎搵番自信心，所以協會有活動，佢梗要現身支持。講到佛誕，林煥光去港大讀咗一個佛學研究碩士課程，讀完後佢嘅得着好大，了解咗「變幻才是永恒」嘅道理，所以佢推介咗好多朋友去讀。
卓妮