中環耳目：陳光丕推介台南金黃番薯
日本食品嘅輻射陰影揮之不去，令到好多食品入口商被迫搵其他產地嘅貨源救急，日貨集中地崇光百貨就急搵台灣美食填補市場。最近佢哋瞓身推廣台灣美食，卓妮都去趁熱鬧，見到台灣經濟部駐港機構遠東貿易中心主任陳光丕嚟撐場，佢極力推介台南烤番薯，勁讚健康又美味。
凍熱食皆宜
卓妮當日見佢好滋陰咁一邊歎一邊讚，金黃色嘅薯肉綿密鬆化，水分適中唔會太乾，最後佢連外皮都食埋，個樣好滿足。
原來呢隻過江番薯來頭不小，係揀選每年二月至六月份最當造嘅台南金黃番薯，經過洗淨、自然風乾後，再以高溫烘烤同急速冷凍而成，凍食或熱食皆宜。最難得係新鮮滋味冇打折扣，風味勝過市面上嘅番薯多多聲，已有香港入口商引入香港。
陳光丕話，近排台灣食品勁好賣，事關市民對日本貨敬而遠之，食品入口商亦都好難買到放心嘅日本貨，所以紛紛轉移陣地到台灣尋找商機。