下屆特首究竟誰人跑出？近期眾說紛紜，「老愛國」話齋：誰能維穩誰做特首。喂！如今就係敲鑼打鼓都搵唔到個識維持香港穩定嘅「人才」，你話香江政壇淪落成咁悲唔悲？
講真，如果做特首只要能「維穩」，而唔係為香港創造優勢，為港人謀福祉，層次可算低到無可再低！打個比喻，如果一間學校嘅校長淨係要求個班主任「維穩」，學生鴉雀無聲就掂，而唔係要求既管好秩序，還要「傳道授業解惑」，你話間學校怎有前途！現在香港選特首，竟然連選一個識管學生秩序嘅都難如登天，你話慘唔慘？你話阿爺有乜辦法唔頭痕？
特首邊個勝算高？網上有民選投票遊戲，全國人大常委范徐麗泰贏一條街。如果你問我范太有冇機？我會答：佢跑出唔算爆冷。如果講維穩，佢親和力贏晒，叻過唐唐、拋離振英哥一條街。如果講治才，唐唐掂邊瓣衰邊瓣，都係「條條fing」；振英哥都係用文字關心貧窮，叻唔過范太。范太起碼夠謙厚，又話自己年紀大，又話曾經患癌，又未做過政府官員。德不孤，必有鄰。
范太充分表現孔子所說的「以約失之者鮮矣」的道理，一個人謹慎約束自己言行，就唔會浮誇亂，過失自會減少。能自覺就不會一世活在蒙昧，范太正是有自覺的人。
早幾日，范太話要考慮多兩個月，又話「兩個月後希望不需要由我決定，已經有人決定參選」。范太參選意欲似不大，然世事難料，有時迫於形勢，身不由己也。「七一」後，如果范太參選，女士可能頂起香港大半邊天！