政情:發叔護駕兩面不是人

鄉議局換屆選舉在即,雖然主席劉皇發如無意外可以連任,但往後四年任期卻存在隱憂。有元朗區鄉事派人士透露,發叔處理菜園村事件,惹來唔少原居民不滿,講到明如果發叔連任後,一定要諗計安撫班原居民,仲要嗱嗱聲處理好村屋僭建問題。不過,發叔一日仲係行政會議成員,都要幫政府保駕護航,夾喺政府同原居民之間,肯定兩面不是人。

菜園村搬村,唔少村民都收到比市價更高嘅賠償,有咁嘅成績真係多謝晒一班不滿政府嘅八、九十後。不過,事件就惹來唔少原居民不滿,事關菜園村收地價較原居民收地高出一大橛,據聞就連發叔身邊嘅兄弟都有微言,覺得壞孩子先至有糖食,非常無理,所以要求發叔連任後記得要安撫班兄弟。

早前申訴專員公署批評政府部門對新界村屋僭建物疏於執法,呢位鄉事派人士話,現時鄉村好多都係外來人,大部分仲要係泛民嘅支持者,所以佢告誡泛民班政客千祈咪諗住抽水批評村屋僭建,如果搞到政府嚴厲執法,佢哋第一件事會要求先清拆外來人嘅新建村屋僭建物,到時睇吓佢哋點向選民交代喎。

Money18免費即秒股票報價網站現推出8升級功能,財經資訊,實時實發!